" الأهلي كسبان في الحالتين " .. تعليق ناري من مذيع أهلاوي علي فكرة التجديد لساسي والتشبيه بالأهلي

شهدت الأيام القليلة الماضية، جدلاً واسعاً عقب تفكير نادي الزمالك في تجديد عقد النجم التونسي فرجاني ساسي، عن طريق جمع الأموال من بيع قميص اللاعب، حسبما اقترح جمهور الأبيض من أجل الإبقاء على لاعبه.

وما بين الشد والجذب، خرج البعض ليقارن الموقف ويصفه بالعادي، مثلما فعل الأهلي ونادي يوفنتوس من قبل عند ضم النجم البرتغالي كريستيانو رونالدو.

وخرج الإعلامي أحمد قيشو، المذيع بقناة الأهلي، عن صمته، ليطلق تصريحات نارية ترد على كذب البعض والحديث عن فعل الأهلي لذلك من قبل، مشيراً إلى أن الأهلي كسبان في الحالتين. سواء تم التجديد لساسي بتبرعات الجماهير أو حتي رحيله عن الأبيض.

وكتب قيشو عبر حسابه على موقع التواصل الاجتماعي فيسبوك التالي:-

" مبحبش اعلق على "الشأن الداخلي الزملكاوي" لكن المشكلة انهم بيجيبوا سيرتنا حتى في مشاكلهم! وهنا مش بتكلم عن جمهور لكن عن الادارة واعلامهم الرسمي.

موضوع ساسي فعلا ميفرقش معايا، لإن في الحالتين أنا كأهلاوي كسبان! 

جددت له بعد تنفيذ كل طلباته؟، فأنت هتبقي وقعت اول قطع الدومينو، والفرقة هتبوظ بسبب "الغيرة" الطبيعية من رقم التجديد لساسي، ومع كل تجديد هتلاقي لاعبتك بتطلب ارقام مبالغ فيها، وهتتحط في نفس الموقف لإنك عملت مبدأ عكس مبادئ الأهلي اللي بتضايقك دي عارفها؟ إن اللاعب "يتشرط" على النادي والنادي هينفذ طلباته! 

فشلت في التجديد؟ فأنت خسرت لاعب مهم عندك، وبالتالي هتضر فنيا، والحقيقة هي خسارة اقل من الخسارة المعنوية اللي هتحصل لما تقدم للاعب كل "التنازلات" دي، وفي الآخر ميقدركش ويسيبك، شعورك وقتها مش هيختلف عن شعور غادة عادل وهي بتقول "ليه كده يا بسيوني ده انا "اتبرعت" عشانك!" 

اما حملة غسيل المخ اللي بيتعرض لها الزملكاوية، من اعلامهم وصفحاتهم فهي حالة يرثى لها الحقيقة، صحيح الأندية بتستفيد من بيع تيشيرتات لاعبيها، الأهلي نفسه عنده معرض "ستور" رسمي لعرض تيشيرتاته سواء نسخة اللاعبين او نسخة الجماهير، بس ده جزء من تعاقدات وحقوق رعاية سنوية، لكن محدش بيعمل تشيرتات للاعب واحد بس عشان يجدد له! دي فاحشة رياضية لم يسبقكم لها أحد من الرياضيين!

بالنسبة لأحد المسئولين الحاليين بالزمالك اللي قال: "العيب أن تلجأ لثري ويخلع ويورطك"!! 

الغريب انه "بيلقح" على الأهلي، رغم ان الكلام ينطبق على ناديه هو، الثري مورطش الاهلي ولا حاجة، والأهلي مازال بهيبته ومعندوش اي مشاكل في التعاقد او التجديد، الثري خلع منك أنت وأنت اللي معرفتش تجدد للاعب شراهولك! والأهلي كان اذكى منك لما رفض تجاوز "سقف المرتبات" وحافظ علي فريقه.

فكرة المعايرة برجال اعمال (مصريين او عرب) سبق لهم دعم الأهلي فدي حاجة كوميدية جدا، هو مين قال أصلا ان ده عيب؟، هم بيحبوا النادي ودعموه ولهم الشكر، في الآخر هم أهلاوية ومحدش فيهم بيمن على النادي بدعمه، ومستقبلناهمش استقبال الفاتحين رغم الدعم ده بالمناسبة.

وبعدين هو مش أنت صاحب اكبر شعبية في الخليج؟ ومشجعيك هم "الصفوة" في مصر؟ طب هم فين؟ ما تخليهم يدعموك بدل ما تخلي المشجع الغلبان اللي بيدبر مصاريف شهره بالعافية يتبرع عشان يجمع 2.5 مليون يورو للمليونير التونسي! 

اخيرا: أزمة التجديد لساسي توضح لك الفارق بين الناديين، نادي مش بيقبل إن لاعب مهما كانت قيمته يشوف نفسه عليه، ونماذج استغناء الأهلي عن لاعبين مهمين مش محتاجة تذكرة، ونادي زي ما انت شايف كده!، وطبعا مننساش موقف الأهلي من قبل الأزمة دي، لما اعلن انه مش بيفاوض ولا هيفاوض لاعب حالي في الزمالك تقديرا لظروفه (اللي هو السبب فيها مش احنا)، ورغم ان مفاوضات الأهلي لأي لاعب زملكاوي مش عيب ولا حرام، ومن حقي استغل الظروف واضعف منافسي اكتر، والزمالك استفاد فعليا ومباشرة من التصريح ده لإن مبقاش أي لاعب هيقدر يساومه بكارت مفاوضات الأهلي له، لكن اهو قدرنا كدا، قدرنا نكون محترمين ومثاليين بزيادة، قدرنا نكون نادي مباديء مش نادي يفط وشعارات كاذبة.

المصدر: https://m.facebook.com/story.php?story_fbid=10224196964370018&id=1179151392

Content created and supplied by: Seliamuhammedmubarak (via Opera News )